أوغوڤواغ لو موند

باعد المرات كنبقا نفكر و نفكر حتى كنلقا راصي وصلت للسطاج اللخر فالتخمام و اللي الماهية ديالو باينة : العووووووووومق كيساوي الانتحار (و العياذ بالله) ،كترجع بيا السينتا لملي كنت صغيرة بزاف و كنمشيو نتبحرو و كترعفني شي موجة و كنقول دابا غنموت،و كنت كنقول :كوثر هادي هي اللخرة ليك... تفكرت بزااف د المواقف، و اللي فيهوم كاملين شفت ملك الموت جاي عند باش يديني ل "لهيه"،و اللي فيهوم كاملين تحركات فيا واحد الحاجة سميتها غريزة الحياة : حاولت ندفع براصي للفوق و نغوت و ندفل الما دالبحر/ حاولت نجري و نهرب و ستغليت گااع الإمكانات.. آه غريزة البقاء واقع ،لكن دابا نو، نات أني مور، و ليت كنطلع فوق من البيرو ،ندفع وراقيا نشد ستيلو فيد و نغوت حتا أنا : ينعل بو العالااااااااااام . دابا ولا كيبان ليا غير واحد الخويط هو اللي كيربطني بهاد الحياة ،وعرفتو شنو كيجيني فبالي ؟ بلي هاد الخيط يقد يتقطع ،و هادي هي اللي عليها كلشي ،هادي هي اللي كتخليه صعيب و ساهل أون ميم طون، هادي هي اللي كتخليه مرة يبان ليا سيكسي و نقول : كوطار جيبي الكوردا د العيد و داك الكرسي د القصب. الانتحار مامرتبطش بالفشل، بعبارة أخرى بسب رأي عباد الله، حقاش غيدويو فيا على كل حال (ماغانمشيوش لگنازة ميس بوقادم ،راها نتاحرت) و كيفما تيكول Emil Cioran : " كلما كبرت كلما عرفت بلي ماكاينينش مبررات للحياة و لا حتى للموت. لنعش و نموت في العبثية الخالصة" .

بزاف گالو ليا : كوثر علاش أفكارك سوداووية ؟ كان هادا سؤال دواحد الدري ملي گلت ليه :نمشيو نقطعو السكة ؟ ننتاحرو و نمشيو، نمشيو لتما، بزوج ؟!! و هو يقول ليا : الناس كيقطعو السكة باش يدوزو لبلاصة خرا ،ماشي ضروري باشي يموتو، أنا ماجاوبتوش حقاش الفعلُ الأكثرُ طبيعيةً اللي يمكن ليا ندير شي نهار هي أني ننتاحر،و حقاش الانتحار كيغومبلاسي ليا النهاية اللي ماكانحملهاش و اللي نقد نطفي التلفزة قبل الوقت على أنو تطلع ليا the end و يتقادا طوم أند جيري .سولت راصي ،دابا انا لاش كنفكر فالانتحار؟ و بعيدا عن كل المعتقدات و الخلفيات الإيديولوجية سواء الدينية منها أو السوسيولوجية ،لقيت بلي جوابي مطابق تماما لجواب إيميل : "لأنني ما إن أعودَ لما قبل ماضيّ، أو أذهبَ لما بعد وفاتي، لا أكاد أجدُ معنىً للحادثِ التافهِ بينَ هاتينِ الفترتين ... يأسٌ بلا داع، دونَ وعي الخيبة، دونَ أيِّ إحساسٍ بالسقوط، يأسٌ صافٍ، و منْ جديدٍ يظهرُ اليقينُ المحزنُ بأنَّ الانتحارَ هو المخرجُ الوحيد، العزاءُ الوحيد، البابُ الأكبر. المرورُ للجهةِ الأخرى عنْ طريقِ تجاوزِ الموت"  .الدري عندو الحق واخا عمو قرا للخوانجي د سيوران ،گاع الي كيقطعو السكة كيدوزو للجهة لخرا، فالحقيقة هوما كيطمعو يعرفو آش كاين لهيه،غير الفرق بينهوم و بين الناس "العاديين" أننا حنا بحال سوبير ماريو، عزيز علينا حبيلة و شريطة ،و غنقزوا !! صحاب الطريب مبلين بال Youpi Jump ،و حنا عندنا الحق فتنقيزة وحدة وهي  : The death Jump